ʻO ka poʻe Ainu (pela ʻia me ka “y” e ka poʻe Aynu akā ma ka ʻōlelo ʻē, e like me ka ʻōlelo Kepanī, ʻo Ainu nō ia) ka poʻe ʻōiwi o ka ʻāina ʻo Hokkaido a i kēia manawa, ua hoʻohui ʻia o Hokkaido me Iāpana mā. Ua huakaʻi mākou i ka ʻāina huʻihuʻi ʻo Sapporo, Shiraoi, a me Nibutani ma Biratori e aʻo ai e pili ana i ka moʻomeheu, ka mōʻaukala, a me ka ʻōlelo Ainu.

E like me kākou, ka poʻe Hawaiʻi, ka lāhui ʻōiwi ʻo Hawaiʻi, ʻaʻole nui ka poʻe Ainu ʻōlelo i ka ʻōlelo kupuna. A e like hoʻi me kākou, ua loaʻa ka wā i pāpā ʻia ai ka ʻōlelo a me ka moʻomeheu Ainu ma waena o ka poʻe e ke aupuni. Ua noi ʻia nā haumāna i hele i kēia huakaʻi e noʻonoʻo a kālailai i nā mea like a me nā mea ʻokoʻa ma waena o kākou, a me kekahi mau haʻawina i pā ai ko lākou naʻau ma ka hele kino ʻana i kēia mau wahi.